Allaaserisartakkama ilaasa katersorneri

1945-mi inunngorninnit ukiut arfineq-marlunngormata meeqqat atuarfiat iserfigaara. Sivitsunngitsoq naqinnerit ilinniartitsissutigineqarneri paasiartulerlugit naqissimasunik atuarniarnersuarmut pulammaappunga. Angerlarsimaffitsinni atuakkat kalaallisuut qallunaatuullu takornartarinngilagut, ataatama qallunaatuut atuartarai anaanama kalaallisuut ingerlaannaq atualersarpai, atuakkanilu sunaluunniit naatinnagu meeqqaminut atoqquneq ajorpaa, taamaammat anilernermini atuakkani toqqortuaannartarpaa. Uagulli meeraasugut toqqugaa ujariarlugu nanillugulu atualaartarparput anaanarpullu angerlarluni illutta tungaanut sangusorlu atuagaq inaanut inissittaraarput, soorluli tiguneqarsimanngitsoq.

Atuarneq ilikkarakku malittaanik allanniarnersuaq misilillattaartalerpara. Meeqqat atuarfianni atuarnera suli naanngitsoq qatanngutigiilluta unnukkut innarnitsinni sinnassarluta oqaluttualioqattaattarnerput nangittutut illugu allatanik oqaluttualiorneq periarpara nuannaralugu. Isumaqarpunga allannermik soqutigisaqarnera tassannga aallartittoq.

Atuakkat meeraanerma nalaani saqqummersut tamaasa atuareerlugit atuagassaaleqinerup qamani ujariatsinertut ittumik misigititsisarnera maannamut attappara atuakkamik sumilluunniit eqqanniittoqanngitsoq paasileraangakku; anaanamali meeraanitsinni atuagassaaleqilerluni nimaarutigisartagaata sunnerpaanga isumaliulersillunga inuugallarninni qanorluunniit ittumik atuakkiorniarlunga.

Matumani saqqummersippakka ukiut ingerlanerini inuiaqatigiinni inooqataaninni allaaserisakkakka inooqatigiinnerup pilersitai.

Neriuppunga atuarumasut kikkuunersut soqutigissagaat.