Pavia Nielsen – Aneerasaartut

Atuagaq ”Pavia Nielsen – Aneerasaartut” piniartut piniarniareersimallutik ualikkut aneerasaartarfimminni oqalungusiaannik pisimasuiusunik imaqarpoq, taamaakkamilu inuiaat kalaallit piniartoqarfimmiut ilarrallattaagaanngitsunik unikkaavinik atuagaq kalaaleqatinut ingerlateqqitanik imaqarpoq.

Atuakkap unikkaarisai kalaallinut ukiuni makkunanni inuusuni nutaarsiassaapput, tassa inuiaat kalaallit piniartunik nakuarsuavissuarnik piniartortaqarsimanerannik saqqummiussanik takussutissaqarami.

Atuagaq tupinnartuni tupinnartorsiassalik aammalumi quianartorsiassaqarluartoq maanna saqqummiupparput.

Neriuutigaarput ”Pavia Nielsen – Aneerasaartut” inuiaat kalaalllit ilassilluarumaaraat, erligisassamissullu qupillattaagassamisut pigiliukkumaassallugu.

Pavia Nielsen inunngorpoq 26. juli 1936 Qaarsuni. Pavia piniartuullunilu aalisartuuvoq. Inuutissarsiornissaminut sungiusarluagaasimavoq pikkorissuullunilu tatiginartuugami. – KNAPK-mi siulersuisuunerni ilaasortaavoq 1973 – 1991, ukiunilumi marlunni kingullerni siulersuisuniiffigisamini siulittaasuusimavoq. – Uummannap Kommunalbestyrelseani ilaasortaavoq 1963 – 1967 aamma 1971 – 1975. – Landstinngimi ilaasortaavoq 1979 – 1987 aamma 1991 – 1995.

Namminersornerullutik Oqartussat nersorinnissutaat sølve pissarsiaraa 1994-imi. – Ataqqinartorsuarmit Dronning Margrethe Aappaannit saqqarmiuligaavoq Ridder af Dannebrog-imik 1994-imi.