Siuleqatussuagut angakkuligartalissuit

Hivshu inunngorpoq 1956-imi avannaarsuani qaammatini sisamani kaperlattartumi nunarsuup avannaarpasinnerpaaffiani nunaqarfimmi Siorapalummi Qaanaap avannaani. Silattorpoq piniartorsuit suli angakkulissuit akornanni inngerutaat oqaluttuaallu tusaasaralugit. Atuarfiup piumasaatut ilani qimallugit qallunaanut aallarpoq; sulili GU Danmarkimi naammassinagu ilaminut uterpoq piniartutullu inuulerluni.

Takorloorsimanngisaannarpaa Europamut uteqqissalluni, europamiunullu inughuit nunatsinnilu inuit qangarsuaanit maannamut inuunerat ileqquilu pillugit oqaluttuarluni angalasalissalluni. Taamatut angalaarnermini USA, Canada allaallu Mongolia tikillugu angalavai inughuit inngerutaat oqaluttuaallu taakkununnga anngullugit assut nuannarineqartartumik. 

Qallunaat nunaanniinnermini eskimologimi ilisimatuut ikiortaattut sulivoq. Tassani sulinermini paasivaa ilisimatuut ilisimasaat piviusunut tunngasut assut killeqartut paatsuuinerillu taakkunani pigineqartartut paasissutissat killeqarnerulersillugit. Tamanna pillugu eqqarsaammini piviusunngortippaa atuagaq manna inuit namminnerpiaq ilisimasaat nalunngisaallu aallaavigalugit taakku oqaasiinnik atuilluni saqqummiussisoq.

Inngerutinik ilisimasani tunngavigalugit suleqataaffigaa atuakkiaq Michael Hauserip aamma Arnaq Grovep atuakkiaat: “Christian Ledenip Uummannami Upernavimmilu 1909-mi 1912-imilu immiussai”.